బాలింత పద్మ మృతితో అచ్చంపేటలో ఉద్రిక్తత | Achampet Bhavani Hospital News

03, Nov 2026 Achampet 176 Views

బాలింత మృతితో అచ్చంపేటలో తీవ్ర ఉద్రిక్తత: భవానీ ఆస్పత్రి ఎదుట బంధువుల ధర్నా, అంబేడ్కర్ చౌరస్తాలో రాస్తారోకో

అచ్చంపేట: పండంటి ఆడబిడ్డకు జన్మనిచ్చిన ఐదు రోజులకే ఓ బాలింత మృత్యువాత పడటంతో నాగర్‌కర్నూల్ జిల్లా అచ్చంపేట పట్టణంలో మంగళవారం తీవ్ర ఉద్రిక్త పరిస్థితులు నెలకొన్నాయి. భవానీ ఆస్పత్రి వైద్యుల నిర్లక్ష్యమే బాలింత ప్రాణాలు బలిగొందని ఆరోపిస్తూ మృతురాలి బంధువులు, కుల సంఘాల నాయకులు మృతదేహంతో రోడ్డుపై ఆందోళనకు దిగారు.

సంఘటన వివరాలు: బల్మూరు మండలం పోలిశెట్టిపల్లి గ్రామానికి చెందిన పద్మ ఐదు రోజుల క్రితం అచ్చంపేటలోని భవానీ ఆస్పత్రిలో ప్రసవించి ఆడబిడ్డకు జన్మనిచ్చింది. మంగళవారం ఆస్పత్రి నుంచి డిశ్చార్జి చేసే సమయంలో ఆమెకు బీపీ (రక్తపోటు) పెరగడంతో వైద్యులు ఇంజెక్షన్ ఇచ్చారు. అయితే ఇంజెక్షన్ ఇచ్చిన కొద్దిసేపటికే పద్మ ఆరోగ్య పరిస్థితి విషమించి కోమాలోకి వెళ్లిందని కుటుంబ సభ్యులు తెలిపారు. మెరుగైన వైద్యం కోసం హైదరాబాద్‌లోని యశోద ఆస్పత్రికి తరలించగా, అక్కడ చికిత్స పొందుతూ పద్మ మృతి చెందింది.

మృతదేహంతో ఆందోళన – పోలీసులతో తోపులాట: వైద్యుల నిర్లక్ష్యం వల్లే పద్మ ప్రాణాలు కోల్పోయిందని ఆగ్రహం వ్యక్తం చేస్తూ బంధువులు భవానీ ఆస్పత్రి ఎదుట ధర్నాకు దిగారు. బాధ్యులైన వైద్యులపై కఠిన చర్యలు తీసుకోవాలని డిమాండ్ చేశారు. ఆందోళనను అడ్డుకునేందుకు పోలీసులు యత్నించడంతో ఇరువర్గాల మధ్య తోపులాట జరిగి పరిస్థితి ఉద్రిక్తంగా మారింది.

అంబేడ్కర్ చౌరస్తాలో 2 గంటల పాటు రాస్తారోకో: అనంతరం మృతురాలి కుటుంబ సభ్యులు, వివిధ ప్రజా సంఘాల నాయకులు, మహిళలు అచ్చంపేట అంబేడ్కర్ చౌరస్తాకు చేరుకుని మృతదేహంతో రాస్తారోకో నిర్వహించారు. సుమారు రెండు గంటలకు పైగా ధర్నా చేయడంతో ప్రధాన రహదారిపై వాహనాలు నిలిచిపోయి ప్రయాణికులు తీవ్ర ఇబ్బందులు పడ్డారు. బాధిత కుటుంబానికి న్యాయం జరిగే వరకు పోరాటం ఆపేది లేదని ఆందోళనకారులు తేల్చిచెప్పారు.

ఈ నిరసనలో తెలంగాణ రాజ్యాధికార పార్టీ నాగర్‌కర్నూల్ జిల్లా అధ్యక్షుడు బీశం ఆంజనేయులు, నియోజకవర్గ ఇన్‌చార్జి నారామోని నరేష్ యాదవ్, ఎస్సీ, ఎస్టీ, బీసీ జేఏసీ నాయకుడు సాయి మహారాజ్, సీపీఎం మండల కార్యదర్శి వర్ధం సైదులు, మృతురాలి బంధువులు మరియు స్థానికులు పాల్గొన్నారు.